மாயம்போ3

அமி அம்கொ ஜெநெத்தெக அம்போ³ மெநீஸ் பொவரியொ. எல்லெ அம்பொ³ மெநத்தெ வத்தொ அவ்ரெ பா⁴ஷா வத்தொ நா: மெநத்தெ மொரெ அபிப்பிராயம். ககொநா மெநெதி தமிழும் 'அம்மா' மெநத்தெ வத்தோஸ் அமி ருவ்வொ மச்சிலிகிந் 'அம்பொ ^3' மெநிமெநரியொ ஸோந் மொரெ ந:ந் புத்திக் லகரேஸ்.

இஸோ மெநெதி அம்பா³க் காய் மெந்நொ? துங்க களநாத்தெயா? அம்பா³க் ‘மாய்' மெநத்தேஸ் ஸெர்க்க ஹொயெ வத்தொ.

ஹொயெதி ஹிந்தா தி³ந்நும் அமி ந:ந்ந நு:ருநுக் 'மாய்'-மெநி ப்ரேவ்கந் பொவத்தெ ஸெராடி தீ வத்தா உபயோக் ஹிப்பிரவல்லிடிரியொ.

அம்ரெ பா⁴ஷா ஸாஹித்தியமும் ஒண்டெ "நீதி ஸம்பு". தெமாம் தெவ்டதாம்—தெவ்ட ஸ்லோகும் மாய் மெநத்தெ வத்தொ அம்பா³ மெநத்தெ அர்த்தும் அவரேஸ்.

36-வது ஸ்லோகும்,

“புஞ் ஸொம்மர் மாயி ஹோஸ் ஸ்ரேஷ்டு²

அகாஸ் ஸொம்மருபா³ப் கு³ரு

வர ஸொம்மரு மொந் பி³ஸ்ஸொ

அஸ்கி ஸொம்மரு வெகுல் ப⁴ரொ.

-மெநி ஸங்கத்தெமாம் ரீ ஈ ஸ்லோகும் "பூமாதேவி ஸொம்மர் அம்போ³ஸ்(மாயீஸ்)செடாவ் மெநி களடராஸ். தீ ஜதொ லெகுத்தா ஸ்லோகும் –

37-வது ஸ்லோகும்—

‘மாயிக் ஸமாநு கோநத்³லந்

மாயிக் ஸமாநு கோந் ரகந்

மாயிக் ஸமாநு கோநொ;ட்³வந்

மாயிக் ஸமாநு கோநி;தௌ’

-மெநெத்தெமாம் ரீ;கிந்,

ஜெநெ மாயிக் ஸமாந்கந் அம்கொ ஆத³ரவ் கெரத்தெநு து³ஸ்ர கொந்நி தெநு நீ:. ஜெநெ மாயிக் ஸமாந் கோந் அம்கொ ரக்ஷநொ(கபடத்தெநொ) துஸ்ர கொந்நி ஜுண்ணா. ஜெநெ மாயிக் ஸமாந் கோந் அம்கொ ஹொட்³வத்தெநு ஸே? துஸ்ர கொந்நிதெநு நீ: ஜெநெ மாயிக் ஸமாந் கோந் ஹிதம்ஹொயெ ப்ரேவ் வத்தாந் அம்ரெஜோள் கெரத்தெநு ஸே? துஸ்ர கொந்நிதெநு ஜுண்ணா.

--மெநெத்தெமாம் ரீ: அம்போ³ மெநத்தெக ஸெர்க்க ஹொயெ அம்ரெ பா⁴ஷா வத்தொ ‘மாய்’ மெநிகிந் அவ்ரெ மேதாவி ராமராயிந் களடராஸ்.

அங்குந்---

39-வது ஸ்லோகும்---

‘தெ⁴ரும் ஜநெத்திஸா ஸ்ரேஷ்டா²

கு³ரு வத்தொ ஸதா³ ருஜு

கு³ருநும் கு³ரு கோந் ஸ்ரேஷ்டு²

மாய் விநா கொந்நி நீ: கு³ரு’.

--மெநிகிந்(மாய்-அம்பொ³) ஜதொ து³ஸ்ர செடா³வ் ஹொயெ கு³ரு கொந்நிதெநு நீ:--மெநி களட³ராஸ். தெக லெகுத்தா ஸ்லோகும்—

40. ‘மாயி பா³புநு வத்தாநும்

ரீ;லிந் தெநு துஷத்திஸொ

சல்லிநிம் மொந்நு முண்ணாத்தொ

சல்நாரிஸொ தெநாஸ் பெ³டொ’.

-மெநத்தெ ஸ்லோகும்ரீ;கிந் ஒண்டெ பெ³டொ மெநத்தெநொ கோந்தாநுக் ர;நொ மெநிகிந் ஸங்கத்தெவேள்,

கோந் ஒண்டெநொ மாய் பா⁴பு வத்தொ ஐக்கிலிகிந் தெங்க மொந்நு துநொ கெர்நாத்தெகோந் சல்லஸ்கீ தெநோஸ் ஸெர்க்கஹொயெ பெ³டொ-மெநி களடத்தெ ஈ ஸ்லோகும் மெள்ளி ராமராயிந் அம்பா³க் மாய்மெநிகிநூஸ் ஸங்கி தெக்கடராஸ்.

தெக ப²ல்லொ 42-வது ஸ்லோகும்,

‘மாயிக் பா³புகு ஸுஸ்ருஷொ

திந்து³ நாத்தொ ஸதா³ கரொ

எக ஸொம்மர் மஹா த⁴ர்மு

துஸ்ரொ கை ஜுண்ண ஸாஸ்த்ருநும்’.

--மெநத்தெமாம் ரீ:கிந்,

ஒண்டெ பெ³டொ மாய்பா³புகு பஜெஹொயெ ஸம்ரக்ஷநொ கெரத்தெவேள் ருவ்வொமெள்ளி விஸி பொட்நாத்தக் ஸிரத்தெகந் கெந்நொ.

தே தாநுக் 47-வது ஸ்லோகும்- "ஸ்ருதிம்மு ஸ்ம்ருதிமுநும் அஸ்கி இக்கெ மொ³ட்டொ ஸாபநாநுக் மெள்ளி பரிஹார் கெரத்தக் வாடுந் ஸங்கிராஸ். ஹொயெத் பெ⁴ளி மெந்நு து³க்கு ஸெராடி ஒண்டெ மாய் தி²யெ ஸாபநாகு கொ³ந்நி ஒண்டெ ஸாஸ்தரும் மெள்ளி பரிஹார் ஜுண்ணா- மெநஸ்திஸாந் விஷயம்தெ³ரி ஸங்கந் அவெ ராமராயிந்,

‘அஸ்கி தெங்கொ விதி⁴ம் மெள்ளி

ஸாபநாநுகு ஸாந்தி ஸே

மாயி ஸாபந ஹோரௌதாம்

ஸமுலந் கொம்மி மார்கு³ நீ:

-மெநிகிந் ஸங்கிராஸ். திஸோஸ் 80-வது ஸ்லோகும்,

‘லோகும் பஞ்சூஜநுஸ் பா³புந்

மாயிந் மெள்ளி தெநுஸ்மெந

ஜெநெத்தெந் கு³ரு க⁴ல்நாரு

வத்³தி³ தா⁴க்த்ராதொ யெங்களிந்’

-எக அர்த்து காயொநா மெநெதி, "ஈ புலோகும் அம்கொ 1.ஜெநடெ³த்தெநொ 2.புரோஹிது 3.க⁴லி பி³ரடி³ ஹொட்வெத்தெநொ 4.சொவ்து ஸிக்கடெ ஒத்³தி³யார்நு 5.தா⁴க் ஜவடி³ ரக்ஷெ ரஜொ-மெநஸ்தாந் ஈ பஞ்சூதெநு பா³பு ஸ்தா²நும் ஸேத்தெநு. எங்க பத்நிந் மாயி ஸ்தா²நு ஹோஸு."-மெநி ஸங்க²ராஸ்.

எக லெகுத்தா ஸ்லோகும்(81) ஸத்ருந் கோந்மெநி ஸங்கந் அவெ நீதி ஸம்பு,

1.கோந் ஒண்டெ பா3ப் பெடாக் ஜுக்கு ரீணு க⁴லி தொவரேஸ்கி தெநொ பெ³டாக் ஸத்ரு.

2.கோந் ஒண்டெ மாயி பெ³டாகு அவ்மாந் உஜட³ரீஸ்கி தெநொ தீ பெ³டாக் ஸத்ரு.

3.ஸுசால் நீ:த்தெ பெ³ய்லு த³ல்லாக் ஸத்ரு.

4.சொக்கட் ஈகு(சொவ்து) ஸிக்குநாத்தெ பெ³டொ பா³புக் ஸத்ரு.

மெநிகிந் ஈ ஸ்லோக் ஸங்க³ந் அவரேஸ்.... தெல்லெ—எல்லெ...........

"ரீணநே பா³பு ஹோஸ்ஸத்ரு

ஹீநநே மாயி ஸத்ருந

ரூபு நீ;த்தெமொ பை³ல் ஸத்ரு

வித்³யாஹிந் பெ³டொ ஸத்ருந.

திஸோஸ், 86-வது ஸ்லோக்,

"ஸெத்து மாயி மதீ பா³பு

தெ⁴ரும் பை⁴ த³யொ ஸிங்க³தி

ஸாந்தி பை³லு ஸவந் ஸூநு

ஏ ஸோஜந் மொரொ பா³ந்த⁴வுந்"

மெநி ஸங்கி,

1.ஸெத்தூஸ் மாய்கந்-2.ஞாநூஸ் பா³ப்கந் 3.தெ⁴ருமூஸ் பை⁴கந் 4.த³யோஸ் ஸிங்க³யித்கந் 5.ஸாந்திஸ் பை³ல்கந் 6.ஸஹுலநூஸ் பெ3டொகந்- ஹட்வத்திஸா இஸா ஸத்கு³ண்ணுந் ரியெதி த்யெ ஆபத்தும் ஹாத் தீ³ தை⁴ர்யு தே³யி. – மெநிகிந்களட³ராஸ். ரியெதி மெள்ளி மேதாவி ராமராயிந் இத்கெ ஸ்லோகுநும் மாய் மெநெத்தெ வத்தோஸ் உபயோக் கெர்ரியதி மெள்ளி த்ருஷ்டி பரிஹார்கந் ஒண்டேஸ் ஒண்டெ ஸ்லோகும்—41வது ஸலோகும் மாய் மெநத்தெ வத்த ஸொட்டி³-அம்பொ³ மெநத்தெ உபயோக் கெர்ராஸ் தீ ஸ்லோக் எல்தெ---

‘’அம்பொ³ பா3நுகு கொ²ப்³பீ³கு

சொகட்³ மொந்நு தொ²விந் ஸதா³

சொகட்³ சல்லத் தெநாஸ் ஸூநு

வஞ்ச்லொ நா:ஸி தெநாஸ் கு3ணி"

-எக அர்த்து காயோநா மெநெதி,"சொக்கட் ஹொயெ பெ³டொ கோந்மெநெதி, கோந் ஒண்டெநொ'கொ²ப்³பி³ம் மாய் பா³புக் ஸ்ரத்³தெ⁴ ஸெர ஸொந்தோஷ் தெ³வட³ரேஸ்கி தெநோஸ். மாய் பா³புகு வஞ்சநொ கர்நாத்தெநோஸ் சொக்கட் கு³ண்ணு ஸேத்தெநொ.

எமாம்ரீ: மீ ஜல்லரியொ காயொமெநெதி பைலாம் ஸங்கெஸோந் அம்பொ³ மெநத்தெ வத்தொ அம்மா- மெநரியொ தமிழ் வத்தாம் ரீ ரூப் மர்ச்சயி அவெ வத்தொ. மாய் மெநத்தேஸ் அவ்ரெ பா⁴ஷா வத்தொ. தெகஹால் அத்தெங்குட்தீ துமி துரெ நு:ருநுக்-நத்தா நதிநிநுக் 'மாய்'- மெநி பொவத்திஸா வட்கெ கெருவோ. ககொ மெநெதி அம்பா³க் மாய் மெநி பொவெதி தெநு ப்ரேவ்கந், "காய் பஜெ பெ³டா?மாய் பெ³டா! மீ தெவுஸ் பெ³டா"-மெநந். தீ ஸொட்டி³ துரெ பெடிநுக் ப்ரேவ்கந் மெநி மெள்ளி’மாய்’ மெநி பொவெஸ் தெநு "பா⁴-பா⁴ மொகோ சார் பவுநும் தெண்டொ கட்டேபா⁴—பா⁴-பா⁴ மொகோ வைரமு நெக்லஸ் கட்டெபா^4"-மெநி துரெ ஜோளுஸ் மகமில்லந்.

துமி ருவ்வொ யோசநொ கெரி ஸவொகா! காய் மீ மெநரியொ செர்க்கஸ்நா:.

***** ******** ******* ******* ********